comme l ailfaune quat.....

asteure , ché jones i jurent te pu qu' avec l' ailfaune quat'....

mi j' vous diro que là j' su djà dépassé,mi j in su resté à l ordinateur avec l' ouepcame et internet et aprés .............

bon arvenons ach' sujet, j'a trouvé cha dans un magazine pour éfants qui s appello "Fripounet et Marisette "

chéto un magazine hebdomadaire à consonnances catholiques pisque l' devise du journal chéto " à coeurs vaillants , rien d impossipe"

mi j y éto abonné , et ché dans ch' jurnal qui date du 2 mai 1968 que j a trouvé ch'te publicité pour eune MAGNIFIQUE boite d' crayons d' couleur ..

hein? pour ché plus ancien ché un sacré cadeau, imaginez eune boite d' QUARANTE CRAYONS D COULEUR.....

attindez , j' dis cha pour les plus jones, savez pas c' que cha pouvo arprésenter pour nous eune boite d' QUARANTE CRAYONS D COULEUR ....

chéto indispensape pour pouvoir craner, s' démarquer d' ses camarates , pour pouvoir ram'ner s' fraise ......

acoutez , eune boite d' quarante crayons d' couleurs, chéto avec eune belle boite d' compas, le nec plus ultra, le somome du cadeau ......

in pourro comparer cha à posseder un ailfaune quat' asteure

attindez , quarante couleurs, zavez vu l' grandeur del boite ..... imaginez que zavez un camarate qui vient juer al' mason et que vous décidez comme cha d' faire un dessin, rin que d' vire ses yeux s écarquiller in voyant l' grandeur del boite, chéto un plaiji inestimape ....

au delà d' l orgueule, ou del fierté d avoir eune belle boite comme cha, chéto qu in avo plein d' teintes différentes d' bleu , d' vert, d' jaune , d' rouche, cha permetto d' faire de sacrées bio dessins en géographie

vous vous souv'nez d' cha ? in nous distribuo des contours d' cartes géographiques, chéto des feules policopiées, souvint cha faijo des traits d' couleur bleusse, et l' feule ale sinto quequ' fo cor l' espece d alcool qui servo pour faire l' reproduction


imaginez, zavez la carte d' la France et i faut mette les bonnes couleurs pour ché différents types d' cultures, là aucun problème, zavez des couleurs, des nuances, des teintes j ' allo dire à l infini , in tout cas dans eune palette d' 40 possibilités ....

souvint l' boite d' crayons d' couleur, chéto eune boite d' 5 crayons minimum, t avo un rouche, un bleu, un vert, un jaune et un noir , aprés t in trouvo soit par 10 ou par 12 , aprés par 18 ..

MAIS LA eune boite d' quarante et in plus dans zeune boite in fer ; le chic du chic, là chéto le lusque

mi j a eu cha ............. mais connaissez djà c' qui a arrivé, j in a perdu, j a rinversé l' boite complete à terre, et bin sur j' m a artrouvé eune paire d' coups à quat' pattes in essayant d' tous les artrouver , sous ch' placard ou sous l' tape, tout cha pendant que m' mère al' m ingueulo avec l' sempiternelle litanie

"que brizaque chtilale, i casse tout, in li acate cha et i en prind pas soin, cha t ' interesse pas ? dis le ..."

mi j 'essayo d' donner l' change, d' dire que cha m interesso, mais savez, i m aurotent offert eune paire d' pistolets d' coboyes , ou eune ouinechestere comme qui yavo johne ouaine dins ses flimes, là ouais j auro été VRAIMINT contint mais là ...

faut dire pourtant et j' me mets al' plache d' mes parints, eune boite de crayons d' couleurs comme cha in plus d' marque caran d' ache (ché pas du patois) ou meme du baignol et farjon , chéto des crayons d' couleur d' qualité

d ailleurs si ya longtimps que zavez pas utiliser des crayons d' couleur, allez en acater en supermarché et zallez vire l' différence ...

asteure quand qu on les talle, in s' deminte si ché vraimint du bo qui a autour ou eune espèce d' aggloméré, pasque ché copeaux i sont tout fins pi i quettent rapid'mint, in fait pu comme dins l' temps des belles spirales , savez un peu comme quand qu in éplucho eune oranche avec un coutieau ..............

aute cosse, ravisez rapid'mint si zavez bin taillé, pasque si zallez trop vite, l' bout del mine d' couleur ale casse tout d' suite

aut' point , comme ché eune espèce d aggloméré qui constituté l' corps du crayon, dés que ch' crayon i qué à terre, l' mine à l intérieur ale est cassée à différints zendroits ...


asteure allez offrir eune boite d' crayons d' couleurs à un jone, meme eune boite d ' 100 crayons, j' sais pas si cha existe, mais imaginons ....

un consel, si vous voulez pas vous archevoir au miu eune reflexion du ginre " mais quo que j' va faire avec cha" ou au pire l arcevoir dins l' guiffe , sachez mes gins que cha interesse pu ché jones d avoir cha en cadeau

vous m' direz , depuis 1968, les cosses ont bien évoluées, et c' qui éto l' nec plus ultra à l époque ché d'venu plus que ringard asteure


et pourtant in s est quand meme appliqué à colorier, à réver tout in remplichant ché cases par ché couleurs appropriées ...

faut dire qu asteure, in est passé du support papier, au support informatique

j' vous l' dit mes gins , l' ailfaune quate ......

mi aussi j'in ai un ché pour min traval.
i m' sert à rintrer les anomalies et diverses données. l'problème ché qui est géolocalisé.
ej l'allume quand j'arrife et l'éteins quand j'ai fini min boulot. eune sorte d' pointeuse déguisée
merci patron!!!