fin d 'saison dins ché gardins

j avo ker cha , aller vire min père quand qui yéto à sin gardin les derniers temps del saison
pu question d arpiquer, d' tracher des routes, d'printe ché plantoirs , ché paquets d' graines, sans parler del binette ou l arrosoir

nan là in in éto à préparer ch' gardin pour l hiver, ch' louchet yéto cor d' sortie , tout cha pour deterrer ché plantes qui avotent monté in graines, ou tout simplemint rinte la terre la plus saine possipe

in faijo des tas avec tout cha, pi in y fouto ch' fu

j avo ker aller y artrouver min père, souvint i faijo pas caud, et chéto l' momint du que ché jardiniers i zétotent souvint insempe

pu question d'saquer d'dins, si ch' est pas fini aujourd hui cha l' s'ra d'main, pi, au pire , in arviendra cor un coup

chéto un momint du que ché jardiniers i discutotent intre eux, autour d' un qui éto in train d' activer sin brasier, in soul'vant avec l' pelle à dints ché zerpes , afin que cha brule plus que cha n' finque ...

cha m impécho pas, d' courir ou d aller m mette dins l' sins del finquée rin que pour l' respirer, bin sur cha duro pas longtimps vu qu' min père i s éto fait un coup ingueuler pasque j' sinto l' finquée in coup en rintrant, comme un sauret , et pas d étalache .....

cha discuto des réussites d' l année, cha discuto aussi del météo qui zavotent eu, i comparotent cha avec l année passée
certains in profitotent pour sortir l' blague à toubaque, d'ouvrer l' blaque, d intiquer eune feule d' dins , d' rouler ch'toubaque d' dins, et d' seul'mint raviser c'qui faijo quand qui devo tout simplemint l am'ner à ses levres pour coller ch' papier .......

après i sortotent leur boite d alleumettes et tout in opinant del tiete pour montrer qui suivotent l' conversation , i protégeotent l' flamme avec eune main, et allumotent l'cigarette

min père, li y en profito pour sortir s' boite d 'bonbons, c' qui bin sur faijo rigoler les zautes, s' boite d' bonbons avec ses "lutti" ou ses "kréma batna" , chéto dins ché préférés ......

pi l' heure ale passo, mi j in avo profité pour déchinte au plus bas del sinte, du que ché gardins i s arretotent et que l' champ cultivé i commincho, juste après un ressaut du terrain

la rue verte ale éto toute proche, j éto un peu comme un indien , au bout d' min territoire, à raviser si yavo pas d'zennemis qui étotent in vue

j armonto à toute blinte jusqu à c'que j' arvo ché jardiniers toudis in train d' babeller

à forche d'em vire m' tortiller sur eune gampe, min père i levo l' camp comme i dijo, tout l' monte arparto vers ses carrés respectifs et la plupart s mettotent in route aussi pour armonter

mi j' voulo soul'ver l' brouette et l' porter comme min père , mais du déji al' réalité , yavo un bout, et min père i arprenno rapid'mint la maneuve ...

cha y est in éto su la rue leverrier ,au bout à droite , l' mason qui faijo l' coin, d' là j ' parto souvint d'vant , en éclaireur, avec l' délicate mission d' annoncher am' mère que min père i rintro bientot ...

cha comminche à dater