m'man , du qui va ?

quand qu in éto tchiot , in raviso ché avions passer dins l' ciel, et in éto intrigué d' abord par l' trainée blanque qui yavo dins sin sillache

après in s' dijo que "cha s'ro pas pour mi" ,l' avion chéto pour ché riches, comme si ché richards là haut , i nous nargottent in passant comme cha au d' sus ché cités ouvrières ......

in imagino à peine si un jur in pourro monter d'dins ......


in éto aussi intrigué in s'demindant vraimint commint que cha volo, et surtout in craigno aussi ch' moyen d' transport là, vu qu en éto tchiot, ale télé in voyo cor assez des asquidents d 'avion que cha faijo la une

yavo eu en 1974 , ch' t avion turc qui éto quéu dans la foret d ' ermenonville,

et l' année avant , ch' te copie "discount" qu in diro asteure , du concorde, le tupolev russe qui s éto écrasé parel, en région parisienne, lors d un meeting aérien

vous m' direz qu in ch'momint avec l' avion malaisien, in attind ch' ponpon....

bref , au delà d' l aspect dangerosité, y avo aussi del curiosité , l' tiete ravisant ch' ciel, ravisant la direction du qui s'dirigeo, en essayant d' trouver sa destination ......

"dis M'man, du qui va ?" qu in d'mindo à s' mère qu ale éto elle dins l' cuisine in train d' faire la vaisselle avec ché gants Mapa rosse.....

s' in suivo eune réponse assez évasive , qui nous satisfaijo qu à moitié ...

asteure , in arrete te pas l' progrès

André, i m' avo invoyé un mail du qui parlo du site "flightradar.com" comme dit l' publicité "live flight tracker" ...
c'est à dire qu en allant such' site là , té peux juer au controleur aérien

quand que té buques such' site là, t arriffe sur eune carte géographique, à ti det' placher au d'sus deut'région et té vo , en temps réel, ché avions qui passent ou qui vont passer au d' sus d' tin coin

et in plus té peux savoir, l'nom d' la compagnie , pi surtout s' destination ....

ch' est bien, mais ch'est un peu comme si in dévoilo un secret d' magicien, ou si in révélo que l' père noel y existe pas , c' qui est faux d' ailleurs .......

mais ch'est vrai que cha fait perde un peu d' la magie

quo que, j a dis eune bétisse juste avant, meme avec ch' site internet là, au momint d' noel, ch'est pas la peine, j dis cha pour les plus jones, d' cacher après la trajectoire du père noel pour savoir quand qui passe dins tin coin et à quelle heure ....

cha , meme avec les systèmes les plus sophistiqués, in arrivera jamais à déjouer l' mystère du père noel, et ch'est tant mieux...

ech t'histoire d'avion m'a rappellé un souvenir pendant la guerre a Bruay in habito au numéro deux et min grand père y avo décidé ed déménager a Diéval parce qu'y dijo qu'avec carbolux qui éto pas loin si y venotte a bombarder cha allo faire du grabuge, cha chéto in 42 ou 43.

A diéval in habito in face de plusieurs patures un jour y a eu eine alerte et in est allé esse réfugier din el pature d'in face a l'abri d'eine ayure (haie) din le ciel chéto in défilé ed bombardier et in momin donné y ont largué des bombes
ché alors qu' eme grand mère naïve elle s'écrie "ravisse y nous jettent des crayons" j'arpinse souvin a ché souvenirs de guerre ech cro pas que cha peut s'oublier avec tant d'autres