tricotache étape 1

d' abord trouver ché modèles, alors ch'éto souvint soit dans "modezétravo" ou "le ptit écho d'lamote" , ch'éto les 2 magazines que m' mère ale avo ker lire , pi que d' dins y avo des photos avec des bios jone garchons comme mi ou des belles dames qui portotent des "bios" pulovères

y avo aussi au miyeu, tout au moins pour modezétravo, y avo , arplié des paches plus fines, presques transparentes, qu in appelo des patrons cha servo à ché femmes qu ale voulotent faire del couture, mais ch'est un aut' sujet

pour arvénir à ché pulovères, m' mère ale raviso ché modèles, ale éto toudis enchantée quand qu ale in voyo un qui li plaijo et qu ale croyo à chaque coup , qu in allo sauter d' joie ach' plafond, rin qu à l idée d' porter cha sur nos zécalettes .........

cor heureux, qu à l adolescence , j a pu choisir cor les couleurs d' pull, et pu "subir" comme j a eu l impression quand que j éto plus jone, bref, j' avo min mot à dire quand meme

et pour m' mère , un "mouais" d' ma part, ch'éto pour elle un ouais d' enthousiasme

eune fo, l'sorte d' pull choisi, ale prenno eune feule d' papier, zinquiétez pas ch'éto pas eune feule neuffe, mariée avec un magasinier qui utiliso chaque manchette d' papier qui intouro ch' journal "la croix du nord" , recto verso pour marquer ché scores de scableu, ou d' vieles feules pour ché votesd ' syndicats, ale avo un stock d' papier d avinche

j' me souviens , ale chausso ses leunettes, pris sin stylo bic, ouais m' mère chéto Bic et min père Reynolds, ceux qui écrivotent cor plus fin, bref ale prenno sin stylo et ale raviso, nan d abord ale avo calculé l' nompe d' pelottes d' laine qui fallo

d ailleurs j' va sauter eune étape , cha li arrivo qu ale parte au magasin d' laine avec plusieurs idées in tiete , et cha dépindo du prix des pelottes

pour tout cha ale avo calculé l' nompe d' pelottes qui li fallo à l avinche

ale avo ker m' printe mes cotes, "t as cor grandi" cha li faijo plaiji del dire...

pi après ale arprenno s' feule et tout haut , ale compto donc l' nompe d' pelottes d' laine qui li fallo , ale faijo dins s' tiete sin chekliste comme i dissent dins ché avions avant d' décoller

"des 8 , j in a " ouais pasque chaque diamete d aiguiles cha correspondo à eune grosseur d' point, et chéto marqué au bout d' chaque aiguile par un bout in plastique du qui yavo d' marqué ch' numéro correspondant

après ale dijo "point de ..." là j' sais pu, bon cha l effrayo pas, ale savo l' faire , pi d' toute fachon , ale avo commint dire eune tchiote nomenclature du qui yavo des desssins et que d' sur yavo ché points d expliqués avec des dessins

in y voyo des dogts autour d zaiguiles , pi avec des flèches pour expliquer la rotatation des mouv'mints à faire ...

bon cha yest , m' mère ale i parto, ale parto so chez Pinguin ou chez Phildar

j ' me souviens avoir du li accompagner plusieurs coups quand que j éto tchiot, mon diu que malheur, l'type d' magasin pas fait pour ché garchons

pas eune carette en miniature ou un fusil en plastique en vue, nan , pi d abord quand té rintro , ch éto eune ambiance particuyere

d abord et chéto cor rare ché ché gins surtout dins ché corons, yavo del moquette à terre, cha faijo qu in avo l impression d' marcher sur du velours

ambiance feutrée aussi, dés l' porte franchie et ch' gling gling du carillon
bon in est pas les seules, y a djà eune dame qu ale coji, et eune qui attind
mi j' tire déjà l'tiete, vu que j' sins qu in n' a pour un momint

pi in parlant d' l ambiance, yavo eune odeur qui s' dégageo j' peux pas vous l' décrire, cha donno eune ambiance confinée, un peu sourde

quand qui yavo du monte comme cha, m'mère ale m inmeno vers ché pelottes , ale in sorto plusieurs, ouais pasque déjà à l époque , yavo cinquante nuances d' gris ....

du gris clair, du plus foncé, m'mere ale hésito, ale gardo en main ceux qu ale avo coji, alle attindo sin tour et quand que chéto à elle, l' dame du magasin, qui porto un pull bin sur, bin ouais ale allo pas porter du coton dins zin magasin d' laine .... ale veno vers elle ..

j' vo que zavez coji...

m' mère sul' défensiffe cha dépind du prix..... ouais pasque tous ché prix étotent pas affichés

l' vendeusse ale me raviso avec un grand sourire jusqu à ses zoreles comme si (bon ch'éto vrai) j éto l' garchon l' plus bio qu ale avo vu, ou alors "quo qui a grandi depuis l' dernier coup" ...

quo qu ale diro pas pour paraite bin aimape et vinte s' laine .......

bon enfin, in quitto l' magasin, m'mère avec mi toute fiere, toute fiere avec sin sac plastique pinguin ou phildar

djà continte d' pouvoir s y mette , mi contint d'et' sorti de chte magasin là et contint d'pouvoir artrouver mes soldats et mes légos

mais en rintrant, hop hop hop, j' devo attinte, ale appelo min père , li montro l' couleur del' pelotte qu ale avo coji
min père i d'mindo combien que cha avo couté, ou meme m' mère avant qui l' deminte , ale li dijo in parlant plus fort " j a pris ch' moins cher" ou "t inquiete pas chéto pas l' plus cher, cha allo jusque telle somme"

mi j attindo pasque m'mère ale allo mette eune pelotte su min bras pour montrer à min père " l effet" que cha allo faire ...