tricotache étape 2

min père li quand qui donno sin avis sur ché couleurs d' pelottes d' laine que m'mère ale avo acaté, i éto toudis d accord
du momint que cha plaijo à m'mère, et ch'éto vraimint pour elle eune joie d' commincher, d' faire et d'terminer ché pulls

non pas qu ale in avo marre, mais ale avo toudis "un chantier" in route, tout du moins dins s' tiete.......

bon cha y est ale s y metto, ale allo querre dins l' pieche d' devant, alors ch' sac avec ché pelottes, s' corbele in osier du qui yavo d' dins différentes pelottes, tout ché fils , ciseaux, boites à aiguilles d' couture, ciseaux, mètre, dés
yavo d'dins aussi eune espéce d' grante épingue d' sureté, cha li servo quand qu ale tricoto, j' cro bin pour faire ché cous , cor que là j' su pas sur, j' su pas un espécialiste du tricotache

après ale ouvro un placard dins l' pieche du miyeu, ale ramenoo un aut' sac, du que d'dins , tel un escrimeur avant sin combat, ale cacho la bonne paire d aiguiles à tricoter pour sin ouvrache

mi j in profito toudis au grand dam dem' mère , d in printe 2 et d' juer aux zépées avec
cha plaijo pas am' mère vu que j' risquo d' m imbrocher un eule, faut dire qu avec m' douceur légendaire, cha auro pu arriver...
tout comme ale ralo pasque j y rindo ché aiguiles tordues ...

bon l' vla qu ale comminche ch' pull, ch' cat y monte sul' tape, et i va s incrinquer dins l' corbeile in osier

quand que j' dis "incrinquer" ch'est l' terme, vu que dés qui éto tout chaton i avo ker s y installer

asteure qu ale a l' taille adulte , comme diro l aute, cha déborde dech' panier , mais cha fait rin, ch'est s' plache stratégique, avec ses ziux d' chinois, ché zoreles à l écoute, à raviser m' mère travailler tout juste à coté d elle
d 'ailleurs ale rale quand que m'mère ale besoin d un truc qui a dins l' corbeile, comme dijo m'mère, chéto la croix et la bannière pour l' sortir d' là

m' mère ale tricoto in compto ché points tout douch'mint, d ailleurs quand té li parlo à ché momints là yavo comme un décalache, ale éto "dins sin pull" ....

ale compto , mais cha li arrivo d' raler si ale devo défaire une rangée si ale s éto trompée

s ' n hantisse chéto aussi d' pas avoir assez d' pelottes, souvint ale compto , arcompto ché pelottes dins ch'sac
jel vo aussi tende ch' pull en direction d' la farniete, pour raviser si chéto régulier

après yavo min père qui arrivo au bout d un momint avec le jeu de "scabeulebilebol" comme i dijo, m'mère alors ale ringeo ché zaffaires au coin del tape, indiquo toudis à min père combien qu ale avo bin avinché et i juottent à cha en fin d après midi

l' lendemain après midi, après avoir prom'né ch'tien ale s armetto à ché pelottes et ché zaiguiles

mi faut arconnaite que j éto moins enthousiaste, j allo pas sauter d' joie pour un pull...

in plus yavo les séances intermédiaires d'essayache, du qui fallo que j' me tienne dro, que j' bouge pas, que m'mère ale tenno d une main ch'tricot et d' l aute ale vérifio, estimo, calculo , l' nompe d'rangées qui li resto à faire

l' plus ridicule pour mi chéto ché essayaches quand qui yavo pas ché manches, j avo l impression d infiler un truc d' clochard

et meme quand que chéto terminé, autant m'mère ale éto fiere et continte, autant mi j' répondo par un "ouais"

comme diro l aute, fallo sel' farcir chtilale ......