champ, gardin, des porions à ché fleurs 4

dins ch' gardin, la grante plache , yavo bin des fleurs mais cha s' limito à un parterre dins l' cour, pi d'vant la mason

rin qu à écire cha, j intinds min père nous crier "assassins !", à mi et à min frère ....

faut dire qu' à midi , eune fo qu in avo mingé, in juo souvent au ballon , et yavo des tirs "meurtriers" , imparapes, que ché tulipes ale quéyotent comme au champ d honneur ......

nous in essayo d' camucher cha, in coupant l' tige ou en essayant qu ale reste dréchée, mais i avo l eule .....

dins l' cour , yvo grinmint d' tulipes, mais mi c' que j' préféro chéto les crocus et les perce neiges

ch éto aussi des fleurs que m'mère ale avo ker, pasque quand que ché crocus i sortotent d' terre, ch éto l' signe non pas que chéto djà l' printemps...

mais que l hiver i éto plus derriere nous que d'vant .....

cor que meme eune fos au printemps, ché jardiniers i l' savent te bin , y a cor les saints de glace à passer avant d' commincher à démarrer vraimint ...

près d' l intrée del mason, yavo des tapis de desespoirs du peintre ...

j in a djà parlé, cham'rappelle tel'mint m' n infance, que j a eune paire d' pots asteure dins min gardin à mi ....

pitit à pitit, comme dijo min père , d' plus in plus souvint, "la terre est d' pu en pu basse "

à mesure que ch' sapin d' noel qui avo planté en 1973 i étendo ché branques et ché racines, i cultivo d' moins en moins

à la fin , i avo gardé qu un rang d' thym , pi ché carottes

jusqu au jur du qui a eu eune mauvaisse surprisse avec sin silo d'carottes, i n avo grinmint d' pourites

savez , ché carottes dont l' queue ale éto comme in bouillie ......

pi j' cro qui n avo marre aussi.....

paradoxal'mint, ch'est pas pour cha qui s a arreté d aller y travailler

cor que "travailler" pour li i li travaillo pu, i avo rimplaché ché légueumes, par ches fleurs