avec du recul

avec du recul, j' imagine qu' mes parints i devotent et'tout contints d' partir comme cha à la Napoule

d' abord parto pas qui qui voulo, chéto djà chti qui pouvo , i fallo s inscrire , fallo avoir l argent pour y aller, après fallo attinte le résultat du tirage, ch'éto un peu comme au loto ...

in savo pas in plus si in allo à Menton ou à la Napoule

pour mes parints cha a été ch' premier grand voyache, avec la famile, in dehors du Ppas d' Calais

ch' t année là, in éto 6 à partir, min père, m'mère, min frère, mes deux sœurs, et pi mi, ch' pitit dernier, j avo pas cor 4 ans ..........

pour mi j' a même un vague souvenir del' préparation du voyache, mes parints avotent acaté deux bouteles que j' avo jamais vu, chéto 2 bouteles thermos

am' mote eune pour du café , et l'aute pour du chocolat, l'eune éto arcouvert d'un dessin écossais, l'aute d'un quadrillache marron et blanc

j' m'in souveno pasque rin qu'à pinser qu'un liquite i pouvo rester au caud comme cha à l'intérieur d'eune boutele, cha teno pour mi du miraque

du voyache , j' vo cor à un momint in a du s arrêter dans eune grante gare, petete Lyon, j' pinse, et là sul' quai juste à coté, yavo un train avec des wagons avec des carettes d' sur, j avo jamais vu cha

aut' souvenir, l arrivée à la Napoule, l' montée en plein solel, même si chéto cor au matin, jusqu aux batimints tout in haut, la vue qu in a eu des 2 grantes farnietes qui yavo, avec l' locomotiffe qu ale finquo cor in bas, su ché rals del voie ferrée, qu ale semblo coller aux courbes du rivache, sans oublier ch' grand pont à arcades qui domino le bord de mer


des souvenirs comme cha, j in a des flash, la visite du musée de Monaco, ché gartes dehors devant ch' palais , mes dégobillaches à répétition dins ché cars ....... ché zotaries qui nageotent dins l' musée océanographique, ch' fu d artifice su la baie , vue de Menton

l io, la couleur de l io, transparente, rin à vire avec ch' nord , bon pas d' vagues aussi et ch' tour in pédalo

capiaux in pale sul' tiete, coups d' solel, verres à leunettes qu in v'no rajouter su ché leunettes "normales"

mi c' qui m avo surpris aussi, et j avo vu que cha toucho grinmint m'mère, chéto l' restaurant à midi, m'mère ale le dijo souvint, mon diu in plus in a pas à faire la vaisselle .........

voilà raconté in quequ'mots le séjour à la Napoule, bizar'mint j'a l' souvenir de quand qu in a arvenu nan pas du voyache en train, mais quand qu in a comminché à "déverser" ché gins tout au long des arrêts in bus

ch' bus i s arrêto , ché gins i déchindotent, i dizotent au revoir, ch' gars i ouvro ché cotés pour artirer ché valisses

j' me souviens qui s éto arrêté rue de Denain , et d' là in éto artourné al' mason

que voyache magnifique, dépaysant , j'a l' souvenir qui faijo vraimint bio et j' pinse vraimint que mes parints, cha avo été d' sacrées belles vacances in famile