ch' mimosa

ch' est taleure in faijant du vélo que j a (fortemint) senti ch' t odeur avant vraimint d' vire ché mimosas qui étotent sul' coté del route

l' mimosa , ch'est so t as ker so té supportes te pas, mi j a ker, mais in in acate jamais vu que m' file ale fait d'zallergies à cha , mais ale est loin d' et' el' seule d ailleurs

d' l arpe tout in fleurs que j a pris in photo, j' a arvu l' l' motif del toile cirée del tape del cuisine à ma mère

ch'éto des fleurs disposées comme dins des cades d' tableaux

j vous zarplante l' décor, mi 8 ans pas grinmint plus, al' mason, et j' a su que Clara , l' cousine à min père ale allo passer

si j éto là ch' est qu in devo et' so un jeudi, l' jur d' repos qu in avo avant que cha passe au mercredi, ou alors ed' vagances, mais j' croro pluto que chéto un jeudi

j' savo donc que Clara ale allo passer, ch'est l' ginre d' chosses qui fallo pas m' dire, pasque j allo passer eune partie d' l après midi à guetter s' n arrivée au coin d' la rue Anatole France, et d' la rue Leverrier

m' mère ale ralo pasque j allo d eune pièche à l aute, à soul'ver ché rideaux , fallo pas toucher à ché rideaux, et j' pouvo faire querre ché plantes d' la jungue qui yavo al' mason

ouais pasque m' mère ale metto des pots partout, appuis d' farniètes intérieurs, et même au sol que yavo des coups in intindo , escusez me à l avinche, un grand "MEEEEEEERTE" qui dijo min père si yavo butté ses ortels dins un trait' d'pot, posé pour li d exprès pour l' faire querre .....

bon arvenons à l'arrivée d' Clara, "la vlà" que j' crie..

mais voyez l' temps que j' signale s' n arrivée , et l' temps qu'ale ouve l' porte, cha prenno un tchiot momint

Clara ale approcho djà des 70 ans, et savez 70 ans à la fin des années 60, ch'est pas 70 ans d asteure .....

et Clara, as' déplacho toudis à pied, avec un cabas dans chaque main , "pour faire équilibe" qu ale dijo en riant , quand que m'mère ale li dijo d' in faire moins

ouais, Clara quand que tel voyo avincher, sur qu avec un cabas (bin rempli) dans chaque main, cha li permetto , commint dire, certes d' barloquer en avinchant , mais en même temps cha li donno comme un rythme, certain'mint pas l' plus rapite, mais au moins qui devo la rassurer dins ses zinterminapes traversées d' Bruay

j el vo cor , arriver al' mason , ouvrer l' porte, rintrer cabas en tiete, les joues bin rouches, l' respiration saccadée, continte d ete arrivée à bon port , comme un batiau qui a connu vints et marées mais qui vo enfin un havre de paix

vindiousse comme j' su poète poète

Clara ale arrivo , ale s asseyo tout d' suite, m' mère ale avincho pour l' débarasser d' ses sacs

eune fo assisse, chéto toudis l' même zizique, "Odette, savez du que j arviens là ?" "j éto à mon del cité 30"

pour ceusses qui savent te pas du qu' chest la cité 30, ch'éto à la limite de Bruay, j allo dire, chéto djà presque Divion, à la limite haute du quartier du 3....

c' qui voulo dire qu habitant rue Florent Evrard , après ch' pont d' chemin d' fer, cha li faijo eune sacrée trotte pour arriver là bo, in plus que pour arriver in haut du 3, vinguette cha monte pas, cha grimpe .....

em'mère ale li dijo que chéto pas raisonnape, et Clara ale avouo qu au matin ale éto partie tot pour et' dins ché premiers à mon dech' dispensaire d' la belle au bois , et d' là ale éto partie avec sin carnet à mon del framacie mutualiste querre ché médicamints

et cor là chéto eune matinée, j allo dire "normale"

j 'pourro vous zarparler d' ses "misères" d' santé, que j' me d'mindo mi c'que chéto un "nescare" , "del tension", "un fibrome" etc etc

Clara chéto aussi "radio Bruay" , si té savo pas quéquosse sur untel qui éto avec untel, té d'mindo à Clara, rar'mint ale savo pas ...

Clara chéto ch' père Noël, mais bin plus souvint qu' li, pasque d abord ale rameno à chaque coup eune boutele d' jus de raisin marque "chaland" , sans parler des fruits selon les saisons, qu ale sorto comme un magicien d' ses cabats qu'in auro pu croire sans fonds vu tout c' qui y avo

mandarines , oranches , pommes, dattes, j in passe et des meilleures

pi jem' faijo l' reflexion su min vélo en arvenant al' mason, ouais, j' busie in pédalant ..

et ch'est vrai qu in plus avec elle, in avo des fleurs ou des plantes selon l' saison
le gui et le houx, la jacinthe, le mimosa, les rameaux ...... ch'éto elle qui l ameno toudis

l' mimosa, jel vo cor sortir ch' bouquet délicat'mint d' sin grand sac in cuir, et l' poser sul' tape

m' mère ale l' armercio tout d' suite , et ale allo cacher dinch' buffet un grand pot in verre, d' à mon Arcopal ou arcoroc, et ale metto l' bouquet d'mimosa d'dins ..

mi j avo ker sintir ch' t odeur, et savez , un coup, j y prenno tel'mint d' plaiji , que j éto grimpé , enfin plutôt incrinqué ché pieds dins l' cayelle, et l' cayelle ale éto que sur 2 pieds ..

zavez compris, l' cayelle ale a ripé, mi j a gliché, et ch' pot y s a renversé
ch' mimosa y a rin eu, mais alors j' l' a intindu ou plutôt j' l' a "sinti" passer, vu que l io ale s'a répandu partout sul tape d abord pi such' carrelache après ..

mais voyez , cha m'a pas impeché , et cha m'impeche pas d avoir toudis aussi ker d' sintir ch' t odeur là, celle du mimosa ........

et d'évoquer, j' devro dire "d' cor évoquer" la cousine à min père , Clara