Merlimont hors saison 15

quand qu on parto du batimint en demi lune qui abrito l' poste d' ché mait' nageurs, et qu in allo par l esplanate en direction de berck, in trouvo un type d' villas bin caractéristique

autant sur l esplanate coté stella, chéto des villas accolées, avec pignon visipe, souvint un escayer pour acceder au premier étache du qui étotent ché pieches à vivre avec eune grante baie vitrée .....

autant su la droite coté berck, cha avo moins de style, chéto plus hétéroclite , sauf l' villa au coin du boulevard de la manche et de l avenue du centre ...

j allo sortir ma science in dijant que chéto du style de l architecte Quetelart, mais si min bio frère i m' l avo pas dit j' auro pas pu vous l' citer chtilale

belle villa au coin de l avenue du centre, comme un château, un bastion, élevé sur plusieurs niveaux, fière construction solite qui semble braver la mer et ses embruns .... derniere précision son architecte i s appelo pour la petite histoire Robert Bonnefond.....

à part cha , j' do vous dire que ch' coté chi d' l esplanate, ch'éto pas min coté favori

à l époque yavo pas cor ché aménag'mints comme l' digue parking ...

nan chéto cor des protections en brandes qui tenotent bon an mal an face aux intempéries qui venotent du large

des déchintes in bo pour permette à ché vacanciers d' acceder à la plage avec ché poussettes et ché landaux ...

su la gauche in commincho à vire s' construire des immeupes , ouais in peut pas appeler cha autremint, d' zimmeupes sans style , enfin pas dans un qui m' faijo plaiji à l époque

cor moins asteure vu que si in ravisse asteure le front de mer de ch' coté là , à part l' villa au coin d' la rue du centre, ché que des immeupes tout le long de ch' coté là

à l époque ,j' vous dijo qu in y allo pas souvint sauf bin sur pour s' promener le long de la digue

j' vous l a dit avant, yavo un endrot du qui avo un tuyau qui veno d' la ville et qui s' deverso su la plache, meme si chéto pas des quantités importantes , et sans in savoir vraimint l origine, m' mère ale avo décidé que d' es' baigner de ch' coté chi d' la plache chéto dangereux pour la santé

en avancant vers l' bout de l esplanate coté berck, rapid'mint yavo pu d' goudron ou tout au moins in auro pu armette eune couche sans problème ...

in plus yavo d' zindrots dans l' sape du qui yavo pas mal d' bouts d' verre alors parel, m'mère ale dijo qui fallo éviter d y aller

au bout du bout, l esplanate, as' termino "in chuchette" , chéto comme un cimétiere aux éléphants ....

chéto là qui yavo le clup nautique, enfin cha n avo rin à vire avec chti qui pouvo y avoir au touquet

cha ressemblo plutôt à eune fourriere, du que té trouvo pele mele, ché chars à voile, des tchiots voiliers autour d un viu hangar en demi lune ......
devant trono eune jeep qui dato ché sur du débarquement allié de 44 ........

on arveno sur nos pas, in passo devant un monumint que j a toudis trouvé "génant" d' trouver là , chéto l' calvaire ..

d ailleurs m' mère ale l avo pas ker, in l' raviso in passant comme chi chéto un sine d' malheur, (tout au moins d' souffrance vous m'direz) mais in voyo pas trop pourquo il éto là , devant la plage, du que l été chéto cris d infants, jeux et insouciance ......


en arvenant sur nos pas que j' dijo, in trouvo su la droite eune villa de plain pied, toute seule , que ch' nom j avo ker , ale s appelo "mickey"

eune année in y avo été vu que j avo un camarate d' la rue de chatellerault qui éto en vagances là bo avec ses parints ...


les années ont passé, et j allo pu en vagances à merlimont, les chosses d' la vie ont voulu que j' rinconte m' femme en région parisienne du qu ale éto originaire

et am dit un coup, que l été, toute tchiote, ale allo avec ses parints passer des vagances à merlimont , et que chéto à la villa mickey

in a calculé les zannées , et in s a apercu qu avant des' rincontrer bin pu tard, in avo tous les deux juer su la meme plache , les memes zannées, mi su la droite et elle su la gauche ......