à la recherche de nos taïons

du que j éto passé ? j a eune aut' passion, ch'est la recherche généalogique, et comme j a retrouvé eune piste, eune branque à développer, j ' m a plus concentré sur cha que sur histoires de chtis ...

surtout qu asteure, arcacher nos taions, ch' est beaucoup plus facile qu y a eune vingtaine d années

quand que j avo comminché en 1997, j avo eune bonne base vu qu' min père éto djà fort agé et qui avo comminché à faire l arpe , mais in travaillo cor d' façon qu in pourro qualifier de rudimentaire asteure

j a invoyé plus d' eune cinquantaine d' lettes dins ché mairies, chéto cor du temps que la recherche généalogique chéto pas cor si en vogue, et ché gins i vous répondotent

cor que djà à Hazebrouck ach' momint là , fallo faire un chèque d' 10 francs pour toute recherche

j in a invoyé du courrier, avec des réponses plus ou moins rapites, i n a eune chéto l' pompon, j a eu la réponse 3 ans après que j ' l avo invoyé, in voyo même que l' coin d' el lette i avo du dépasser un bon momint d un tas d' papier, i éto pu vraimint del meme couleur

cha arrivo même dins ché mairies que des employés quand que té d'mindo un acte d' naissance ancien, ou un mariache ou un décès, i t' faijotent les recherches en amont

asteure , si quéqu un i voudro s' lancer, in a plusieurs moteurs de recherches gratuits j' précisse, qui vous permettent d avincher rapid'mint

mi j' va souvint sur Généanet, cor que, faut printe ché résultats avec des pincettes, et vérifier par ti même, vu que certains , d hippothesses, i zint font des certitutes, alors vaut miu toudis vérifier

en tout cas, c' qui est sur, ch'est les archives départementales, et celles du Pas de Calais et du Nord, disponipes sur internet, ont mis en ligne les actes de naissance, de mariages, de décès de plus de 100 ans

ya même des listes d' incorporations militaires, mais j' do avouer que là, j y a plutôt trouvé des confirmations, et que cacher dins ch' tout ch' tas là ch' est pas évident

sans quo y a cor , pour la périote 1800 à 1916, y a les tables de recensements, cha ch' est bien, cha permet d' savoir à l instant "t" qui qui habite dans un log'mint

on s aperçoit que ché viux i restotent à mon d'ché zéfants, que souvint , yavo dans l' bassin minier, des gins qui avotent un locataire , cha permet aussi d' connaite tous les prénoms des éfants à eune périote donnée

ch' est sur que ch'est fastidieux mais quand qu in i print gout in a du mau à s in séparer