Riquiqui et Roudoudou

ch'est pour les plus anciens, riquiqui et roudoudou ch'éto 2 personnaches de bandes dessinées , des années 50 au tout début des années 70

roudoudou ch'éto un cabri, un cabri malicieux qui éto pas ch' dernier pour faire des betisses

riquiqui li, ch'to un tchiot ourson, tout gentil, in tout cas plus sache que roudoudou

j in a lu des histoires d' eusses, mais si j a toudis gardé ché noms là c'est qu un coup j' m éto fais arclaquer m'guiffe par em' mère

chéto un jur que Clara, l' tante à min père, marcheusse si y en avo eune, traversant Bruay d' part en part, pour aller chi al' cité 30, pi ardéchinte , armonter au quat' , pour finir sin péripe journalier al' mason , vers chinq heures au soir, sin cabas cor plein d' chosses qu ale allo donner

des fruits acatés au marché, des dattes, des figues, du jus d'raisin d' la marque chaland , bref j' l a jamais vu arriver al' mason les mains vites


comme ale faijo souvint des péripes dans Bruay et qu ale connaisso du monte, quand qu in avo des questions à poser, quand que mes parints i s'souvenotent pu si untel i éto mort, si y habito cor là, si l' fils untel quo qui deveno, cha finisso toudis par "in l' demand'ra à Clara quand qu ale va v'nir"

Clara chéto un ordinateur avant l heure, m' mère ale dijo , Clara j a eune question à vous poser, l' fils untel quo qui d'vient ?

Alors là in avo dro djà au départ à sin arpe généalogique, c héto l' fils untel et d eunetelle, s' soeur ale éto marié avec un polonais , i zhabitotent rue machin chosse, et j in passe et des meilleures

mi quo que j' devo avoir , 8 ans tout au plus, durant l' conversation , mi j éto assis aussi al' tape del cuisine, in éto tous assis autour del toile cirée, ché verres étotent rimplies, Clara ale buvo un verre d iau, mi j' buvo du chaland avec des gatiaux que Clara ale avo aussi apportés bin sur ...

ché conversations, y a des coups, commint vous dire, quand qu in a 8 ans tout au plus , in acoute sans acouter les discussions des grands ....

sauf quand que Clara ale commincho à parler moins vite pi surtout moins fort, cha sinto l' secret, ou tout au moins quéquosse d' pas forchémint bio , eune maladie souvint, mais aussi des fos des phrasses qui s' finissotent te pas, et que m'mère et Clara i s'ravisotent d un air entendu ...

tout in vérifiant que j' acouto pas .....

mais savez ché tchiots même d à peine 8 ans fallo pas trop leur en conter....

ch'est pas pasqu in éto en train d' faire un coloriache, avec des crayons de couleur ramenés par Clara, sur un cahier de coloriache ...ramené par Clara bin sur....

qu in pouvo pas avoir eune orele qu ale traine .......

et un coup, j avo compris qui yavo du brin dins l' tale dins zin couple , et que l' femme ale éto partie des' mason ..

et mi, ch'est là qu in vo que j éto cor tchiot, curieux comme pas deux, j a posé machinal'mint l' question ...

j' m' n intinds cor l' dire "ch'est qui ?" et m'mère ale a tourné l'tiete dans m' direction et qu'ale répond "riquiqui et roudoudou"

cha y est ale m avo arclaqué min clapet, j' raviso bizarre du coin d' l eule min verre d' jus de raisin..

que ch'éto un ancien verre à moutarde et que d'sur en dessins yavo bin sur riquiqui et roudoudou

ch' t expression là j' l a gardé en tiete, et suffit qu in disse ou que j intinte ch'est qui ? que m' réponse ale est déjà prête ....