Eine musique à leumières

Vers 1928, min père i m'immena à mon d'sin camarade Emery, qui habitot dins l'avenue des fleurs, l'eine des dernières maisons avant l'fosse 6 et qui étot radio amateur.

I nous fit vir et acouter sin dernier montache : un poste ed T.S.F. dins l'ginre de ch'ti del photo. Ches triodes étotes montées au dessus de ch'poste, pour miux s'arfrodir, et in veyot ches filaments qui éclairotent un molé. Ej fus émerveillé par ch'l'apparel qu'j'ai baptisé aussitôt "musique à lumières" (j'avos pas l'drot d'parler patois al maison).

A partir de ch'jour là, j'ai bassiné mes parints pour qui z'acatent eine "musique à leumières" ch'qui z'ont fait quèques mos après. Ch'étot un apparel compliqué : i avot in potentiomètre à bouton rotatif par lampe, pour l'chauffage du filament. In avot l'choix intre l'durée d'vie des tubes si in les faijot éclairer trop fort pour avoir d'el puissance sonore et eine musique moins bonne, si in restot raisonnap'.

Su l'devant du poste i avot deux bobines (les selfs, i in manque eine su l'photo). Elles étotes montées sur deux bras qu'in rapprochot ou qu'in écartot pour cacher après eine station. Pour canger ed gamme d'ondes i fallot canger ches selfs et in mett' des aut' avec des nombres ed tours ed fil différints (in n'avot un jeu ed six).

Pour archevoir suffisammint ed stations i fallot eine grande antenne. El not' al étot tindue intre nou ch'minée, rue du Cap Vert et l'chminée del maison d'in face, rue du Sénégal. Cha faijot au moins 150 mètres ed long. Et al étot bien isolée des ch'minées par un chapelet d'isolateurs électriques in verre.

Ch'l'haut parleur i étot séparé. Ch'étot un superbe pavillon à col de cygne. El son i étot quéque fos un molé nasillard mais on s'in contintot (les gramophones 78 tours i faijotent pas miux).

Et ch'est à partir de ch'momint là que j'sus dev'nu un auditeur assidu, les jeudis après midi, des émissions enfantines de Grand Papa Léon (Léon Plouvier), sur Radio Lille.