JMK - L’résurrection ed min pa
par klavzer jean marie le, 30/04/2006Ch’n’est pos unne cacoule. Souvint contée par cheux qu’is l’avotte vécue, et ben qu’un tiot peu aringée au fil du temps, cheule aventure ale est réellemint arrivée à min père et min monnonke, dit « cravate ».
Pindant la guerre, chelle ed trinte neuf, ches mineurs, comme les autes, is cachotte à faire boulir leux marmites. Min père arcachot unne paire ed kilos d’pétotes ou des rapes, vir un quart ed burre. Ches ceinsiers is l’invoïotte souvint à l’uch, heureusemint, dins l’timps i avot ouvré dins unne ceinse du coté d’Hulluch et i r’venot souvint contint.
Un bieau jour l’v’là vers La Bassée, in route à pousser su sin biclo. I vot un camion allemand arrêté su l’bas coté, d’ dins des viux soldats étotte occupés à rigoller d’li. Min père qui in pus du chti, parlot allemand, et unne paire d’autes langaches, i leux dit in passant « putôt que d’rire de m’guife, donnez me à minger » et i continue s’route. Min longin d’monnonke qui poussot cinquante metes pus lon, i n’a rin intindu ben sur…
Un peu pu lon, ch’camion i dépasse min père. I vot un soldat li jech’ter unne espèce ed pavé, i l’print su s’tiête, du cop l’vla asniqué su l’dinne. Monnonke, vert ed troulle, i vot cha, arfait l’quémin à l’invers et déboule dins l’coron in criant « i ont bousillé Charlot »! Avec courache, min pépère qu’i avot été blessé in catorze, print sin biclo, forchémint tout l’monte étot al presse. D’un cop, i crot avoir unne bleusse vue, in apperchevant su ch’bas coté d’el route, min père, ténant d’unne main sin biclo avec unne reule in uit et d’l’aute ech gros pain carré, aussi durt qu’el bouloche qu’i avot à sin front, jech’té par un soldat qui s’atindot pos à intinte sin parlage route de La Bassée.
In rintrant à leu mason, pépère, in r’drechant s’tiête i a dit « os frez à vous mote, mi d’ech pain là j’in minche pos ». In ch’timps là, cha méritot unne médalle, unne de pus pou li…