el cuisson des frites
par Marie-Claire le, 02/05/2006Pisqu' in est partis sur chés frites in va continuer
Y a plusieurs chosses importantes à savoir et à faire pour faire des bonnes frites, à l' manière belge donc
D'abord l' miux i parait qu' ché l' graisse d' boeuf mais mi j' connos putôt l' graisse d' porc qu'in appelle l' saindoux, ché c' qu'in utilisot putôt dins min coin
enfin in va dire que l' graisse animale ché miux que l' graisse végétale
l' but pour avoir des bonnes frites ché qu'ales soient moelleuses à l' intérieur et croustillantes à l' extérieur
Alors pour cha, faut pas les coper trop fines et i faut les cuire deux fos, mi j' fais core toudis cha même avec eune friteusse electrique
in les cuit eune première fos dins eune graisse pas trop caude mais ale bonne température quand même, après mi j'ouffe l' friteusse, j'arleffe ch' panier et là i faut que l' température de l' graisse ale soit plus élévée quand ché bon in arplonge chés frites et l' cuisson ale dot ete plus rapide el deuxième fos
dès que j' sors chés frites, j' les mets dins un saladier avec dins l' fond deux feulles d' sopalin et in faisant sauter et tourner chés frites, cha éponge l' surplus d' graisse qui a pas l' temps d' pénétrer dins l' frite si in fait cha dès l' sortie
passeque, j' vous esplique, in fait l' vapeur d'iau del patate qui provient del cuisson ale impèche l' gras d' pénétrer dins l' frite pindant l' cuisson et juste après
In fait des frites qui sortent del friteusse, y a qu' l'extérieur qui est gras et pas l'intérieur
mais si i reste trop d' huile, ale pénètre dès qu' ches frites ales arfroidissent
chétot juste eune parenthèse pour espliquer l' bien fondé d' l'affaire qui faut les éponger rapid'mint
et pis après y a pus qu'à saler, in hayonnant ch' saladier, ché miux qu' dins l'assiette toudis pour el même raison ché qu'ale sortie y a core del vapeur d'iau dins l' patate qui va absorber ch' sel ou eune aute épice
bon appétit ...