Em première quatre chevaux (1)

Dins les années 48-49, in travaillot l'samedi. In habitot Lille et, pour aller vir nous parints à Bruay in Artois, i fallot prind', l'samedi à 18 h, l'car Citroen Lille-Lens-Bruay, in incrinquant l'voiture d'infant su ch'toit d'l'autobus. Et même ju pour arvénir l'diminche soir. Ch'étot assez pénipe.

A l'foire commerciale d'Lille in 1949, Renault i exposot es'nouvelle 4 ch et i avot des essais gratuits du qu'in nous immenot faire in tour dins Lille. Bin qu'ch'étot à la limite ed nous moyens, in a craqué et in a commandé eine 4 ch (avec 18 mos ed délai d'livraison !).

Heureusemint, in septembre 1949, el ministère ed l'éducation nationale i m'a invoyé faire in stage à l'usine Renault ed Billancourt, du qu'el 4 ch al étot fabriquée. Sur plache j'ai pu faire avincher min dossier et, fin septembre, j'su arvénu avec eine 4 ch. J'étos pas trop fier car ch'étot l'première fos qu'ej conduijos tout seul et j'ai comminché par traverser Paris, pi un marché à Amiens, mais ch'a s'est bien passé.

A ch'l'époque là, l'route nationale 41 Lille-Bruay ch'étot cinquante kilomètres ed mauvais pavés et l'suspinsion d'el 4 ch al avot du mau à les supporter : tout les quinze mille km i fallot rimplacher toutes ches biellettes du train avant.

Ech moteur i n'avot qu'eine puissance réelle ed 21 ch. Les bons jours in arrivot à plafonner à 80 km/h. Mais, si in avot el vint d'face et des valises su l'galerie d'toit in n'arrivot pu à dépasser l'soixante !

Mais ch'étot l'réalisation ed nous rèves d'infants et, dins nous souvenirs, in i a pardonné tous ses défauts. L'photo al arprésinte eine excursion au sommet du Mont Aigoual in juillet 1951.